factum est autem in sabbato secundoprimo cum transiret per
sata vellebant discipuli eius spicas et manducabant
confricantes manibus
quidam autem Pharisaeorum dicebant illis quid facitis quod
non licet in sabbatis
et respondens Iesus ad eos dixit nec hoc legistis quod fecit
David cum esurisset ipse et qui cum eo erant
quomodo intravit in domum Dei et panes propositionis sumpsit
et manducavit et dedit his qui cum ipso erant quos non licet
manducare nisi tantum sacerdotibus
et dicebat illis quia dominus est Filius hominis etiam
sabbati
factum est autem et in alio sabbato ut intraret in synagogam
et doceret et erat ibi homo et manus eius dextra erat arida
observabant autem scribae et Pharisaei si in sabbato curaret
ut invenirent accusare illum
ipse vero sciebat cogitationes eorum et ait homini qui
habebat manum aridam surge et sta in medium et surgens stetit
ait autem ad illos Iesus interrogo vos si licet sabbato bene
facere an male animam salvam facere an perdere
et circumspectis omnibus dixit homini extende manum tuam et
extendit et restituta est manus eius
ipsi autem repleti sunt insipientia et conloquebantur ad
invicem quidnam facerent Iesu
factum est autem in illis diebus exiit in montem orare et
erat pernoctans in oratione Dei
et cum dies factus esset vocavit discipulos suos et elegit
duodecim ex ipsis quos et apostolos nominavit
Simonem quem cognominavit Petrum et Andream fratrem eius
Iacobum et Iohannem Philippum et Bartholomeum
Mattheum et Thomam Iacobum Alphei et Simonem qui vocatur
Zelotes
Iudam Iacobi et Iudam Scarioth qui fuit proditor
et descendens cum illis stetit in loco campestri et turba
discipulorum eius et multitudo copiosa plebis ab omni Iudaea et
Hierusalem et maritimae Tyri et Sidonis
qui venerunt ut audirent eum et sanarentur a languoribus
suis et qui vexabantur ab spiritibus inmundis curabantur
et omnis turba quaerebant eum tangere quia virtus de illo
exiebat et sanabat omnes
et ipse elevatis oculis in discipulos suos dicebat beati
pauperes quia vestrum est regnum Dei
beati qui nunc esuritis quia saturabimini beati qui nunc
fletis quia ridebitis
beati eritis cum vos oderint homines et cum separaverint
vos et exprobraverint et eiecerint nomen vestrum tamquam malum
propter Filium hominis
gaudete in illa die et exultate ecce enim merces vestra
multa in caelo secundum haec enim faciebant prophetis patres
eorum
verumtamen vae vobis divitibus quia habetis consolationem
vestram
vae vobis qui saturati estis quia esurietis vae vobis qui
ridetis nunc quia lugebitis et flebitis
vae cum bene vobis dixerint omnes homines secundum haec
faciebant prophetis patres eorum
sed vobis dico qui auditis diligite inimicos vestros
benefacite his qui vos oderunt
benedicite maledicentibus vobis orate pro calumniantibus
vos
ei qui te percutit in maxillam praebe et alteram et ab eo
qui aufert tibi vestimentum etiam tunicam noli prohibere
omni autem petenti te tribue et qui aufert quae tua sunt ne
repetas
et prout vultis ut faciant vobis homines et vos facite
illis similiter
et si diligitis eos qui vos diligunt quae vobis est gratia
nam et peccatores diligentes se diligunt
et si benefeceritis his qui vobis benefaciunt quae vobis
est gratia siquidem et peccatores hoc faciunt
et si mutuum dederitis his a quibus speratis recipere quae
gratia est vobis nam et peccatores peccatoribus fenerantur ut
recipiant aequalia
verumtamen diligite inimicos vestros et benefacite et
mutuum date nihil desperantes et erit merces vestra multa et
eritis filii Altissimi quia ipse benignus est super ingratos et
malos
estote ergo misericordes sicut et Pater vester misericors
est
nolite iudicare et non iudicabimini nolite condemnare et
non condemnabimini dimittite et dimittemini
date et dabitur vobis mensuram bonam confersam et
coagitatam et supereffluentem dabunt in sinum vestrum eadem
quippe mensura qua mensi fueritis remetietur vobis
dicebat autem illis et similitudinem numquid potest caecus
caecum ducere nonne ambo in foveam cadent
non est discipulus super magistrum perfectus autem omnis
erit sicut magister eius
quid autem vides festucam in oculo fratris tui trabem autem
quae in oculo tuo est non consideras
et quomodo potes dicere fratri tuo frater sine eiciam
festucam de oculo tuo ipse in oculo tuo trabem non videns
hypocrita eice primum trabem de oculo tuo et tunc perspicies ut
educas festucam de oculo fratris tui
non est enim arbor bona quae facit fructus malos neque
arbor mala faciens fructum bonum
unaquaeque enim arbor de fructu suo cognoscitur neque enim
de spinis colligunt ficus neque de rubo vindemiant uvam
bonus homo de bono thesauro cordis sui profert bonum et
malus homo de malo profert malum ex abundantia enim cordis os
loquitur
quid autem vocatis me Domine Domine et non facitis quae
dico
omnis qui venit ad me et audit sermones meos et facit eos
ostendam vobis cui similis est
similis est homini aedificanti domum qui fodit in altum et
posuit fundamenta supra petram inundatione autem facta inlisum
est flumen domui illi et non potuit eam movere fundata enim
erat supra petram
qui autem audivit et non fecit similis est homini
aedificanti domum suam supra terram sine fundamento in quam
inlisus est fluvius et continuo concidit et facta est ruina
domus illius magna